Mama wa kijana mwenye umri wa miaka 15, Tre’Von “Tre” Riggins, amerejea kwa mara ya kwanza katika nyumba aliyokuwa akiishi na mwanawe tangu kutokea kwa tukio la kusikitisha la kupigwa risasi lililosababisha kifo chake.
Akizungumza kwa huzuni kubwa, mama huyo amesema bado yuko katika hali ya mshtuko huku akijaribu kuikubali hali halisi ya kumpoteza mwanawe. Aidha, ameeleza kuwa amepokea taarifa mpya kuhusu mazingira ya mauaji hayo, jambo lililoongeza maumivu katika kipindi hiki kigumu.
Alibainisha kuwa licha ya changamoto alizowahi kukumbana nazo mwanawe hapo awali, alikuwa ameanza kubadilika na kuonyesha mwelekeo mzuri wa maisha.
“Hakuwa mtu wa kubadilika ghafla, lakini alikuwa bora zaidi kuliko mwaka uliopita, hata kuliko ilivyokuwa Jumamosi iliyopita,” alisema mama huyo.
Tukio hilo lilitokea Machi 28 majira ya saa 1:15 jioni, ambapo Tre alipigwa risasi karibu na uwanja wa michezo uliopo ndani ya makazi aliyokuwa akiishi na mama yake. Kifo chake kinaongeza idadi ya vijana wanaopoteza maisha kutokana na vitendo vya vurugu katika jiji hilo.
Taarifa zinaeleza kuwa mwaka mmoja uliopita, kijana huyo aliwahi kuhusishwa na matukio ya uhalifu wa vijana na kuwekwa chini ya uangalizi wa kisheria baada ya kumjeruhi kwa bahati mbaya kijana mwenzake kwa risasi. Pia aliwahi kutoroka nyumbani mara kadhaa, akidai kutafuta uhuru nje ya sheria na mipaka iliyowekwa kwa ajili ya usalama wake.
Baadaye alijiunga na programu ya huduma kwa vijana ya New B.O.Y, ambapo mwanzilishi wake, Kareem Hine, alieleza kuwa kulikuwa na dalili za mabadiliko chanya.
Kwa mujibu wa Hine, Tre alianza kuonyesha ushiriki mkubwa wakati wa mdahalo uliokuwa ukijadili nafasi ya mfumo wa kijamii dhidi ya maamuzi binafsi ya vijana.
Katika mdahalo huo, Tre alinukuliwa akisema:
“Nadhani mfumo unawaweka vijana wa kiume katika mazingira ya kushindwa, kwa sababu kama ningewajibishwa ipasavyo mapema, nisingefanya kosa lile.”
Kauli hiyo iliwagusa wengi na kuacha ukimya mzito ukitanda miongoni mwa washiriki.
Kifo cha Tre kimeibua tena mjadala mpana kuhusu changamoto zinazowakabili vijana na nafasi ya jamii katika kuwasaidia kufanya maamuzi sahihi kabla ya kuathirika na mifumo ya uhalifu.
Follow @omriamajl
